ព្រឹត្តិការណ៍​ប្រកួត​កីឡា​អេឡិចត្រូនិក​ជើង​ឯក MPL KH រដូវ​កាល​ទី​៦ ឆ្នាំ​២០២៤ ឈាន​ដល់​វគ្គ​ផ្តាច់​ព្រ័ត្រ​នា​​រសៀល ​ថ្ងៃ​អាទិត្យ ទី​១៩ ខែ​ឧសភា ឆ្នាំ​២០២៤ ​រវាង​​ក្រុម​ខ្លាំង See You Soon និង D-Roar Legends នៅអគារ PH Grand Hall បុរីប៉េង​ហួត រាជ​ធានីភ្នំពេញ។

ក្រុម​ខ្លាំង​មាន​បទ​ពិសោធ​ច្រើន D-Roar Legends ស្ថិត​ក្រោម​ការ​ដឹក​នាំ​របស់​គ្រូ ស៊ីន ប៊ុនឆៃ ដែល​ត្រូវ​បាន​គេ​ស្គាល់​ថា Coach Chhay ខណៈ​ក្រុម See You Soon ​ក្រោម​ដឹក​នាំ​របស់​គ្រូ​បង្វឹក​ ឈឹម វិទូ ដែល​ល្បី​ឈ្មោះ​ថា​ Coach CatGod។

បើ​និយាយ​ពី​គ្រូបង្វឹក Chhay ធ្លាប់​បានដឹក​នាំ​ក្រុម See You Soon ឈ្នះ​ជើង​ឯក​ MPL KH ជា​មួយ​ក្រុម See You Soon រដូវ​កាល​ទី​១ ឆ្នាំ​២០១៩  និង​ជើង​ឯក​រង​នៅ​រដូវ​កាល​ទី​២ ឆ្នាំ​២០២០ ហើយ​ឥឡូវ​នេះ​លោក​​បាន​ដឹក​នាំ​​ក្រុម D- Roar Legends ឡើង​វគ្គ​ផ្តាច់​ព្រ័ត្រ​ជា​លើក​ទី​១។

ចំណែក​​គ្រូ​បង្វឹក CatGod បាន​ដឹក​នាំក្រុម See You Soon ​ឈ្នះ​ជើង​ឯក MPL KH ​រដូវ​កាល​ទី​៥ កាល​ពី​ឆ្នាំ​២០២៣​កន្លង​ទៅ ហើយ​បាន​ឡើង​ដល់​វគ្គ​ផ្តាច់​ព្រ័ត្រ​ជា​ថ្មី​សម្រាប់​ការពារ​តំណែង​ជើង​ឯក​ឆ្នាំ​ចាស់​របស់​ខ្លួន។ លោក​ធ្លាប់​មាន​បទ​ពិសោធ​លេង​ឲ្យ​ពីរ​ក្រុម​ផ្សេង​គ្នា​ក្នុង​ពាន​រង្វាន់ MPL KH។

ស្ថិតិ​ប្រកួត​ក្នុង​រដូវ​កាល​នេះ​របស់​ក្រុម​ទាំង​ពីរ

នៅ​វគ្គ៨​ក្រុម​ចុង​ក្រោយ Upper Bracket ក្រុម See You Soon បាន​យក​ឈ្នះ​ក្រុម PRO Esports ដោយ​លទ្ធផល ៣-១, នៅ​វគ្គពាក់​កណ្តាល​ផ្តាច់​ព្រ័ត្រ Upper Bracket យក​ឈ្នះ​ក្រុម CFU Gaming ដោយ​លទ្ធផល ៣-០ និង​វគ្គ​ចុង​ក្រោយ Upper Bracket ក្រុម See You Soon ពាន​យក​ឈ្នះក្រុម Team Flash KH ដោយ​លទ្ធផល ៣-០ ដើម្បី​ឡើង​ទៅ​កាន់​វគ្គ​ផ្តាច់​ព្រ័ត្រ។

ចំណែក​ក្រុម D-Roar Legends នៅ​វគ្គ Upperr Bracket ៨ក្រុម​ចុង​ក្រោយ​​បាន​យក​ឈ្នះ​ក្រុម Duck Rice Esport ដោយ​លទ្ធផល ៣-១, នៅ​វគ្គពាក់​កណ្តាល​ផ្តាច់​ព្រ័ត្រ Upper Bracket បាន​ចាញ់​ក្រុម Team Flash KH ដោយ​លទ្ធផល ៣-១ ដែល​ធ្វើ​ឲ្យ​ពួក​គេ​ធ្លាក់​ទៅ​កម្រិត Lower Bracket ដែល​នៅ​វគ្គ​​នេះ​ពួក​គេ​បាន​យក​ឈ្នះ​ក្រុម CFU Gaming ដោយ​លទ្ធផល ៣-០ និង​វគ្គ Lower Bracket ចុង​ក្រោយ​បាន​សង​សឹក Team Flash KH ដោយ​លទ្ធផល ៣-១ ដើម្បី​បាន​ឡើង​ទៅ​វគ្គផ្តាច់​ព្រ័ត្រ​ជួប ក្រុម See You Soon ​ដណ្តើម​ជើង​ឯក។

តើ​ក្រុម​ណា​នឹង​បង្កើត​ប្រវត្តិ​សាស្ត្រ​ឈ្នះ​ជើង​ឯក MPL KH ជា​លើក​ទី​២ និង​ក្លាយ​ជា​​ក្លាយក្រុម​ទៅ​ប្រកួត​ពាន​រង្វាន់​អន្តរជាតិ MLBB Mid Season Cup (MSC) ​នៅ​​ប្រទេស​អារ៉ាប៊ីសាអ៊ូឌីត?