លីគ MPL Cambodia ចាប់ផ្តើមរដូវកាលទី ១០ ជាមួយមុខមាត់ថ្មីមិនធ្លាប់មាន

ព័ត៌មាន 02-04-26 bopha

លីគកីឡាអេឡិចត្រូនិកកម្ពុជាអាជីពលើវិញ្ញាសា Mobile Legends: Bang Bang (MLBB) Professional League គឺ MPL Cambodia ចាប់ផ្តើមរដូវកាលទី១០ នៅថ្ងៃទី៣ ខែមេសា ឆ្នាំ ២០២៦ ដោយមានការប្រែមុខមាត់ថ្មី។

ក្នុងសន្និសីទសារព័ត៌មានបើករដូវកាលថ្មី កាលពីថ្ងៃទី១ ខែមេសា ឆ្នាំ ២០២៦ ក្រោមអធិបតីភាពឯកឧត្តម លន់ សាមឌី អគ្គលេខាធិការនៃសហព័ន្ធកីឡាអេឡិចត្រូនិកកម្ពុជា បានបង្ហាញថា MPL Cambodia រដូវកាលទី១០ មានលក្ខណៈពិសេស ៣ ដែលបានធ្វើឲ្យមានលក្ខណៈពិសេស ទាក់ទាញ និងស្វិតស្វាញជាងរដូវកាលមុនៗ។

ឯកឧត្តម លន់ សាមឌី អគ្គលេខាធិការសហព័ន្ធកីឡាអេឡិចត្រូនិកកម្ពុជា បានឲ្យដឹងថា ការប្រកួត MPL នៅរដូវកាលនេះរៀបចំធំជាងឆ្នាំមុនៗ និងមានក្រុមចូលរួមច្រើន។ ការអនុញ្ញាតឲ្យក្រុមចូលរួមបានច្រើននៅពេលនេះដូចអ្វីដែលសហព័ន្ធបានស្នើសុំទៅខាងអ្នករៀបចំជាយូរមកហើយ។ កាលណាមានក្រុមច្រើនបានមកចូលរួមប្រកួតនោះការបណ្ដុះធនធានក៏មានច្រើនដូចគ្នាដែរពិសេសការប្រកួតកម្រិតអាជីពបែបនេះ។

ទី១ ក្រុមអាជីពចំនួន ១០ បានចូលរួមប្រកួតដែលមានការកើនឡើងជាងរដូវកាលមុនៗមានតែ ៨ ក្រុម។ ការកើនឡើងចំនួន ក្រុម ជាសញ្ញាបញ្ជាក់ឲ្យឃើញពីការប្រកួតប្រជែងកាន់តែខ្លាំង និងរីកចម្រើនកាន់តែច្រើន។ ទី២ ប្រាក់រង្វាន់សរុបបានកើនឡើងដល់ចំនួន ៥ ម៉ឺនដុល្លារអាមេរិក ប្រៀបធៀបនឹងឆ្នាំមុនៗមានតែ ៤ ម៉ឺនដុល្លារអាមេរិកហើយទី៣ ជាប្រវត្តិសាស្ត្រដំបូងហើយដែលមានក្រុមកីឡាការិនីចូលរួមប្រកួតជាមួយក្រុមបុរសៗ។ ប្រការនេះគឺជាការលើកកម្ពស់ និងជំរុញទឹកឲ្យស្ត្រីបង្ហាញសមត្ថភាពប្រកួតប្រជែងកម្រិតអាជីពកាន់តែខ្ពស់ ហើយកាន់តែទាក់ទាញ។

ព្រឹត្តិការណ៍រៀបចំនៅ MPL Cambodia Arena ដែលក្រោមការត្រួតពិនិត្យរបស់សហព័ន្ធកីឡាអេឡិចត្រូនិកកម្ពុជា និងក្រុម T.Y. Media & Advertising Co. Ltd ជាមួយក្រុមហ៊ុន Moonton Games។ ការប្រកួត ចាប់ផ្ដើមពីថ្ងៃទី៣ ខែមេសា រហូតដល់ ១៧ ខែឧសភា ឆ្នាំ២០២៦៕