ព្រឹត្តិការណ៍​ប្រកួត​កីឡា​អេឡិចត្រូនិក​លំដាប់​ពិភព​លោក​ជុំ​ចុង​ក្រោយ MLBB Mid Season Cup ឆ្នាំ​២០២៤ នៅ​ប្រទេស​អារ៉ាប៊ីសាអ៊ូឌីត ត្រូវ​បាន​ចាប់​ឆ្នោត​ជ្រើស​រើស​ពូល​រួច​រាល់​ហើយ ខណៈ​ក្រុម​តំណាង​កម្ពុជា See You Soon ស្ថិត​នៅ​ក្នុង​ពូល​ B សុទ្ធ​តែ​ក្រុម​ខ្លាំង​ៗ។

ជម្រើស​ក្រុម​ខ្លាំង​ទាំង​អស់​មក​ពី​ទូទាំង​ពិភព​លោក​មាន​ចំនួន​១៦​ក្រុមនៅ​ជុំ​ចុង​ក្រោយ​ ត្រូវ​បាន​បែង​ចែក​ជា​៤​ពូល ដែល​ក្នុង​១​ពូល​មាន​៤​ក្រុម។ លទ្ធផល​នៃ​កា​រ​ចាប់​ឆ្នោត ក្រុម​កម្ពុជា See You Soon ស្ថិត​នៅក្នុង​ពូល B ដែល​មាន​ដៃ​គូ​សុទ្ធ​តែ​ក្រុម​ខ្លាំង​គឺ Fantic ONIC (ឥណ្ឌូណេស៊ី)  Selangor Red Giants (ម៉ាឡេស៊ី) និង​ក្រុម Team Falcons (ក្រុម​ម្ចាស់​ផ្ទះ អារ៉ាប៊ីសាអ៊ូឌីត)។

ក្រុម​ឥណ្ឌូណេស៊ី Fantic ONIC គឺ​ជា​ក្រុម​ខ្លាំង​លំដាប់​ពិភព​លោក​ដែល​ស្ទើរ​តែ​និយាយ​បាន​ថា ជា​អធិរាជ​វិញ្ញាសា MLBB។ និយាយ​ឲ្យ​ខ្លី​សម្រាប់​ព្រឹត្តិការណ៍​ប្រកួត​ធំ​ៗ​សំខាន់​ទាំង​ថ្នាក់​ជាតិ តំបន់ និង​ពិភព​លោកគិត​ចាប់​តាំង​ពី​ឆ្នាំ​២០១៩​រហូត​ដល់​ឆ្នាំ​២០២៤ ពួក​គេ​បាន​ឈ្នះ​ជើង​ឯក​៨​ដង និង​ជើង​ឯក​រង​២​ដង (គិត​គ្រប់​កម្មវិធី)។

ក្រុម​តំណាង​កម្ពុជា See You Soon ជា​ក្រុម​ជើង​ឯក MPL-Kh ឆ្នាំ​២០២៤ និង​ជា​ក្រុម​លេខ​១​សម្រាប់​ការ​ប្រកួត​ជម្រុះ​ថ្នាក់​ជាតិ ដើម្បី​​ប្រកួត​ជម្រុះ​តំបន់​អាស៊ី ស្វែង​រក​កៅអី​ទៅ​ជើង​ឯក​ពិភព​លោក នៅ​ប្រទេស​អារ៉ាប៊ីសាអ៊ូឌីត​ដែរ។

ការ​ប្រកួត​វគ្គ​សន្សំពិន្ទុ​ក្នុង​ពូល MLBB MSC ចាប់​ពី​ថ្ងៃ​ទី​៣ ដល់​ទី​៧ ខែ​កក្កដា ខណៈការ​ប្រកួត​ខ្វែង​ចាប់​ពី​ថ្ងៃ​ទី​១០ ដល់​ទី​១៤ ខែ​កក្កដា ឆ្នាំ​២០២៤។

សម្រាប់​ប្រាក់​រង្វាន់

• ជើង​ឯក៖ ១​លាន​ដុល្លារ​
• លេខ​២៖ ៥០​ម៉ឺន​ដុល្លារ
• លេខ​៣ និង​៤៖ ២០​ម៉ឺន​ដុល្លារ
• លេខ​៥​ដល់​៨៖ ​១០​ម៉ឺន​ដុល្លារ
• លេខ​៩ ដល់​២៣៖ ក៏​ទទួល​បាន​ប្រាក់​រង្វាន់​លើក​ទឹក​ចិត្ត​ដែរ