ក្រុម​អត្តពលិក​​អេឡិចត្រូនិក​អ្នកចម្បាំងអង្គរ (Angkor Warrior) តំណាងដោយក្រុម​កីឡាការិនី CFU Serendipity លើ​វិញ្ញាសា Mobile Legends: Bang Bang នារី ទទួល​បាន​​៣​ពិន្ទុ តាម​រយៈ​ជ័យជម្នះ ដោយ​លទ្ធផល ២-០ លើ​ក្រុម​ជម្រើស​ជាតិ​ឡាវ សម្រាប់​ការ​ប្រកួត​បើក​ឆាក​ជម្រុះ​តំបន់​អាស៊ី-អូសេអានី កាល​ពី​ថ្ងៃ​ទី​២២ ខែ​មិថុនា ឆ្នាំ​២០២៤ ​ដើម្បី​ស្វែង​រក​កៅអី​ទៅ​កាន់ការប្រកួត កីឡាអេឡិចត្រូនិកពិភពលោក លើកទី១៦ ឆ្នាំ២០២៤ (IESF – International Esports Federation 16th World Esport Championship 2024) នៅរាជធានីរីយ៉ាត ប្រទេសអារ៉ាប៊ីសាអ៊ូឌីត។

​តំបន់​អាស៊ី-អូសេអានី ទទួល​បាន៦​កៅអី​ឡើង​ទៅ​ជុំ​ផ្តាច់​ព្រ័ត្រ​ទី​ក្រុង​រីយ៉ាដ។ ក្នុង​នោះ​ ការ​ប្រកួត​ត្រូវ​បាន​បែង​ចែក​តំបន់​អាស៊ីកណ្តាល១​កៅអី អាស៊ី​ខាង​កើត​១​កៅអី អាស៊ីអាគ្នេយ៍​២​កៅអី អាស៊ី​ខាង​ត្បូង​១​កៅអី និង​អាស៊ី​ខាងលិច១​កៅ។

សម្រាប់​តំបន់​អាស៊ី​អាគ្នេយ៍​មាន​ក្រុម​នារី​ចំនួន៩​ចូល​រួម​ប្រកួត​ប្រជែង​។ ការ​ប្រកួត​ត្រូវ​បាន​បែង​ចែក​ជា​២​ពូល​គឺពូល A៖ ក្រុម​នារី​ថៃ វៀតណាម មីយ៉ាន់ម៉ា ម៉ាឡេស៊ី និង​ហ្វីលីពីន និង​ពូល B៖ ក្រុម​​កម្ពុជា ព្រុយណេ ឥណ្ឌូណេស៊ី និង​ឡាវ។

ការ​ប្រកួត​សន្សំពិន្ទុ​យប់​នេះ វេលា​ម៉ោង​៩​យប់ ក្រុម​នារី​កម្ពុជា​ត្រូវ​ប្រកួត​ជា​មួយ​ក្រុម​នារី ព្រុយណេយ។

កម្មវិធី​ប្រកួតជម្រុះ​របស់​នារី​កម្ពុជា​

• កម្ពុជា vs ព្រុយណេ វេលា​ម៉ោង៩​យប់ ថ្ងៃ​ទី​២៣ មិថុនា
• កម្ពុជា vs ឥណ្ឌូណេស៊ី  វេលា​ម៉ោង៩​យប់ ថ្ងៃ​ទី​២៤ ខែ​មិថុនា

បន្ទាប់​ពី​ចប់​វគ្គ​សន្សំពិន្ទុ​ក្នុង​ពូល ឈាន​ចូល​វគ្គ​ពាក់​កណ្តាល​ផ្តាច់​ព្រ័ត្រ​​គឺ​ ក្រុម​លេខ១​ក្នុង​ពូល A ប៉ះ ក្រុម​លេខ២​ក្នុង​ពូល B ហើយ​ក្រុម​លេខ​២​ក្នុង​ពូល A ប៉ះ ក្រុម​លេខ​១​ក្នុង​ពូល B។ ក្រុម​ដែល​ឈ្នះ​​ទាំង​ពីរ​គឺ​ជា​​ក្រុម​ទទួល​បាន​កៅអី​​ធ្វើ​ដំណើរ​ទៅ​ប្រទេស​អារ៉ាប៊ីសាអ៊ូឌីត ប៉ុន្តែ​ក្រុម​ទាំង​ពីរ​ត្រូវ​ប្រកួត​វគ្គផ្តាច់​ព្រ័ត្រ​ដើម្បី​បង្ក្រប់កិច្ច។ ​ការ​ប្រកួត​​ជម្រុះ​​ធ្វើ​តែ Online ​ប៉ុណ្ណោះ​ ដូច្នេះ​មាន​ន័យ​ថា ក្រុម​ទទួល​បាន​ជោគជ័យ​នឹង​ធ្វើ​ដំណើរ​ទៅ​ប្រទេស​អារ៉ាប៊ីសាអ៊ូឌីត៕

សូម​ទស្សនា​វីដេអូ

https://web.facebook.com/100046370572694/videos/1385443722150768