ក្រុមកីឡាការិនីអេឡិចត្រូនិក CFU Serendipity បានគ្រងជើងឯកព្រឹត្តិការណ៍ប្រកួត Queen Legends រដូវកាលទី២ បន្ទាប់ពីធ្វើបានយ៉ាងល្អឥតខ្ចោះគិតចាប់តាំងពីការប្រកួតជុំសន្សំពិន្ទុ រហូតដល់វគ្គខ្វែង ចាប់ពីថ្ងៃទី៦ ខែកញ្ញា ដល់ ថ្ងៃទី១៩ ខែតុលា ឆ្នាំ ២០២៥។
ព្រឹត្តិការណ៍ប្រកួតលីគនារី Queen Legends រដូវកាលទី២ មានក្រុមចំនួន ៨ ចូលរួមប្រកួតគឺ CFU Serendipity, Galaxy Phoenix, Duck Rice Athena, Valhalla Valkyries, Team Flash Violet, Quality X One, Evil Eye Serenity និង Lunar Divas។
ការប្រកួតវិលជុំសន្សំពិន្ទុ ចាប់ពីថ្ងៃទី៦ ខែកញ្ញា ដល់ទី៣ ខែតុលា ដោយក្រុមនីមួយៗឆ្លងកាត់ចំនួន ៧ ប្រកួតដូចគ្នា។ បន្ទាប់ពីចប់វគ្គវិលជុំសន្សំពិន្ទុ ក្រុម Evil Eye Serenity ធ្វើបានល្អជាងគេដោយរកបាន ១៥ ពិន្ទុ ឈរលើកំពូលតារាង ខណៈក្រុម CFU Serendipity (១៤ពិន្ទុ) ស្ថិតនៅលេខ ២, Galaxy Phoenix (១៤ពិន្ទុ) លេខ៣, Duck Rice Athena (១២ពិន្ទុ) លេខ ៤, Valhalla Valkyries (១២ពិន្ទុ) លេខ៤), Team Flash Violet (៥ពិន្ទុ) លេខ៦, Quality X One (៤ពិន្ទុ) លេខ៧ និង Lunar Divas (០ពិន្ទុ) លេខ៨។
ក្រុមលំដាប់កំពូលទាំង ៦ បានឡើងទៅវគ្គខ្វែង ចាប់ពីថ្ងៃ១៦ ដល់ទី១៩ ខែតុលា ឆ្នាំ ២០២៥។ ក្រុម CFU Serendipity និង Evil Eye Serenity ឈរចាំវគ្គ Upper Bracket Semifinals ពាក់កណ្តាលផ្តាច់ព្រ័ត្រ ក្នុងនាមជាក្រុមចំណាត់ថ្នាក់លេខ១ និងលេខ២ ពីការប្រកួតសន្សំពិន្ទុ ខណៈក្រុមលេខ ៣ លេខ៤ លេខ៥ និងលេខ៦ ត្រូវប្រកួតវគ្គ Upper Bracket Quarterfinals។
ក្រុម CFU Serendipity បានយកឈ្នះក្រុម Vallhalla Valkyries ដោយលទ្ធផល ៣-០ ដើម្បីឡើងទៅកាន់វគ្គ Upper Bracket Final ដែលបានយកឈ្នះក្រុម Galaxy Phoenix ៣-០ ទៀត ឡើងទៅកាន់វគ្គ Grand Final។
នៅវគ្គផ្តាច់ព្រ័ត្រដណ្តើមជើងឯក Grand Final ក្រុម CFU Serendipity នៅតែបន្តភាពខ្លាំងដោយមិនឲ្យដៃគូតដៃរួចទៀតក្នុងលទ្ធផល ៣-០ លើក្រុម Galaxy Phoenix ដើម្បីគ្រងជើងឯក Queen Legends រដូវកាលទី២ និងជាការពារជើងឯកឆ្នាំចាស់បានជោគជ័យ បន្ទាប់ពីពួកគេបានឈ្នះជើងឯករដូវកាលទី១។
ពិធីបំពាក់មេដាយ និងពានរង្វាន់ ក្រោមអធិបតីភាពឯកឧត្តម លន់ សាមឌី អគ្គលេខាធិការសហព័ន្ធកីឡាអេឡិចត្រូនិកកម្ពុជា។
ចំណាត់ថ្នាក់
- លេខ១៖ CFU Serendipity ទទួលបាន ២២,០០០,០០០ រៀល
- លេខ២៖ Galaxy Phoenix ទទួលបាន ១២,០០០,០០០ រៀល
- លេខ៣៖ Evil Eye Serenity ទទួលបាន ៨,០០០,០០០ រៀល
- លេខ៤៖ Valhalla Valkyries ទទួលបាន ៦,០០០,០០០ រៀល
- លេខ៥៖ Team Flash Violet ទទួលបាន ៣,៤០០,០០ រៀល
- លេខ៦៖ Duck Rice Athena ទទួលបាន ២,២០០,០០០ រៀល
- លេខ៧៖ Quality X One ទទួលបាន ២,២០០,០០០ រៀល
- លេខ៨៖ Lunar Divas ទទួលបាន ២,២០០,០០០ រៀល
ក្រុមកីឡាការិនីអេឡិចត្រូនិក CFU Serendipity បានគ្រងជើងឯកព្រឹត្តិការណ៍ប្រកួត Queen Legends រដូវកាលទី២
ឯកឧត្តម លន់ សាមឌី អគ្គលេខាធិការ សហព័ន្ធកីឡាអេឡិចត្រូនិកកម្ពុជា បានចូលរួមទស្សនាការប្រកួត និងសំណេះសំណាល
ការប្រកួតកីឡាអេឡិចត្រូនិកលីគនារីកម្ពុជា Queen Legends រដូវកាលទី២ ចាប់ពីថ្ងៃទី៦ ខែកញ្ញា ដល់ទី១៩ ខែតុលា ឆ្នាំ ២០២៥ ដោយមានក្រុមនារីចំនួន ៨ ចូលរួមប្រកួត
