នៅ​ព្រឹក​ថ្ងៃ​ទី១ ខែ​តុលា ឆ្នាំ ២០២៥ ឯកឧត្តម លន់ សាមឌី អគ្គលេខាធិការ​សហព័ន្ធ​កីឡា​អេឡិចត្រូនិក​កម្ពុជា បាន​ជួបពិភាក្សា​ការងារ​ជា​មួយ ក្រុម​ហ៊ុន​ខេមបូឌានព្រីមៀរលីគ (CPL) តំណាង​ដោយ​លោក Peter Koo អ្នក​គ្រប់​គ្រង​ទូទៅ​ ដើម្បី​បង្កើន​កិច្ច​សហការ​ក្នុង​ការ​ជំរុញ​អភិវឌ្ឍ​វិញ្ញាសា eFootball ប្រភេទ Console។

កិច្ច​ពិភាក្សា​បាន​ឯកភាព​គ្នា​​លើ​គោល​បំណង​សំខាន់​គឺ​ទី១ ដើម្បី​អភិវឌ្ឍ​វិញ្ញាសា eFootball ប្រភេទ Console ដែល​នឹង​គ្រោង​​រៀបចំ​កម្មវិធី​ប្រកួត​​​ជា​រៀង​រាល់​ឆ្នាំ​ដោយ​​ EFC និង CPL អម​បន្ថែម​លើ​​​លីគ​បាល់ទាត់​អេឡិចត្រូនិក​ E-Cambodian Premier League ដែល​មាន​ស្រាប់។ ទី២ ផ្តោត​លើ​ការ​រៀបចំ​ក្រុម​ជម្រើស​ជាតិ​ដោយ​ហៅ​កាត់​ថា អ្នក​ចម្បាំង​អង្គរ (Angkor Warrior )​ជា​ប្រភេទ​ក្រុម​ជម្រើស​ជាតិ​អនឡាញ។ 

ជា​មួយ​គ្នា​នេះ សហព័ន្ធ​កីឡា​អេឡិចត្រូនិក​កម្ពុជា ក៏​គ្រោង​រៀបចំ​ការ​ប្រកួតជើង​ឯក​ថ្នាក់​ជាតិ​ ​លើ​ប្រភេទ​វិញ្ញាសា Console នេះដែរ​​​ក្នុង​ឆ្នាំ ២០២៥៕