សហព័ន្ធ​កីឡា​អេឡិចត្រូនិក​កម្ពុជា បាន​រៀបចំ​ការ​ប្រកួត​ជើង​ឯក​ថ្នាក់​ជាតិ ឆ្នាំ​២០២៤ មាន​ពីរ​វិញ្ញាសា​ដោយ​បាន​ធ្វើ​សន្និសីទសារព័ត៌មាន​ កាល​ពី​ថ្ងៃ​ទី​១២ ខែ​វិច្ឆិកា ឆ្នាំ​២០២៤ ក្រោម​វត្តមានឯកឧត្តម ជា ច័ន្ទបរិបូរណ៍ ប្រធាន​សហព័ន្ធ​កីឡា​អេឡិចត្រូនិក​កម្ពុជា លោកបណ្ឌិត វង់ ឌីម៉ង់ អគ្គនាយក​រង​អគ្គនាយក​ដ្ឋាន​កីឡា​នៃ​ក្រសួង​អប់រំ យុវជន និង​កីឡា និង​តំណាង​គណៈកម្មាធិការ​ជាតិ​អូឡាំពិក​កម្ពុជា។

ក្នុង​សន្និសីទសារព័ត៌មាន​នៅ​រសៀល ថ្ងៃ​ទី​១២ ខែ​វិច្ឆិកា ឆ្នាំ​២០២៤ នៅ​ក្រសួង​ព័ត៌មាន ឯកឧត្តម​ លន់ សាមឌី អគ្គលេខាធិការ​សហព័ន្ធ​កីឡា​អេឡិចត្រូនិក​កម្ពុជា​បាន​ឲ្យ​ដឹង​ថា ការ​ប្រកួត​ជើង​ឯក​ថ្នាក់​ជាតិ ឆ្នាំ​២០២៤​មាន​២​វិញ្ញាសា​គឺ Mobile Legends Bang Bang និង eFootball Mobile ដែល​ជា​វិញ្ញាសា​ដ៏​ពេញ​នៅ​ក្នុង​ពិភព​លោក។ ការ​ប្រកួត​ធ្វើ​ឡើង​ពី​ដំណាក់​កាល​គឺ វគ្គ​ជម្រុះ​តាម​អនឡាញ​ពី​ថ្ងៃ​ទី​៦ ដល់១៨ ខែ​វិច្ឆិកា សម្រាប់​វិញ្ញាសា eFootboll Mobile និង​ពី​ថ្ងៃ​ទី៨ ដល់​ថ្ងៃ​ទី​២២ ខែ​វិច្ឆិកា សម្រាប់​វិញ្ញាសា MlBB។ ការ​ប្រកួតនៅ​ទី​​លាន​ផ្ទាល់ នៅ​ថ្ងៃ​ទី​១៩-២០ ខែ​វិច្ឆិកា សម្រាប់​វិញ្ញាសា eFootball និង​នៅ​ថ្ងៃ​ទី​២៣-២៤ សម្រាប់​វិញ្ញាសា MLBB នៅ​មជ្ឈមណ្ឌល​កីឡា​អេគុចត្រូនិក T.Y Center។

ឯកឧត្តម​ ជា ចន្ទបរិបូរណ៍ ប្រធាន​សហព័ន្ធ​កីឡា​អេឡិចត្រូនិក​កម្ពុជា បាន​​លើក​ឡើង​ថា ការ​ប្រកួត​ជើង​ឯក​ថ្នាក់​ជាតិ​នេះ​ក៏​ជា​ផ្នែក​មួយ​នៃ​ការ​ត្រៀម​ខ្លួន និង​សមត្ថភាព​របស់​ក្រុម​កីឡាករ​ដើម្បី​ត្រៀម​ខ្លួន​ប្រកួត​លើ​ឆាក​អន្តរជាតិ​នា​ពេល​ខាង​មុខ។ ជា​ពិសេស​កីឡា​ស៊ីហ្គេម ឆ្នាំ​២០២៥ នៅ​ប្រទេស​ថៃ ប៉ុន្តែ​​​​​​ក្រុម​កីឡាករ​នីមួយ​ៗមិន​អាច​នៅ​ខ្លាំង​ជា​រៀង​រហូត​ទេ ប៉ុន្តែ​សហព័ន្ធ​នឹង​ជំរុញ​លើ​ប្រភេទ​វិញ្ញសា​ណា​ដែល​មាន​នៅ​ក្នុង​កីឡា​ស៊ីហ្គេម ឆ្នាំ​២០២៤។

ឯកឧត្តម​​ប្រធាន​សហព័ន្ធ​បាន​សង្កត់​ធ្ងន់​ថា ៖«បច្ចុប្បន្ននេះ យើង​កំពុង​ធ្វើ​បាន​ល្អ​ហើយ តែ​ក៏​ត្រូវ​ពង្រឹង​លើ​អាជ្ញា​កណ្តាល​​បន្ថែម​ទៀត។ ដរាប​ណា​មាន​ខ្ញុំ កីឡា​អេឡិចត្រូនិក​​គឺ​ត្រូវ​តែ Fair Play ជា​និច្ច គ្មាន​បក្ស​ពួក គ្មាន​ខ្សែ​ដាច់​ខាត។ យើង​ត្រូវ​តែ​ពង្រឹង​ទាំង​គោល​ការយុត្តិធម៌ និង​វិន័យ ក្រម​សីលធម៌ ដើម្បី​ក្លាយ​ជា​កីឡា​អាជីព​ពិត​ប្រាកដ»។

ការ​ប្រកួត​ជើង​ឯក​ថ្នាក់​ជាតិ​នេះ​រៀប​ចំ​ដោយ​​សហព័ន្ធ​កីឡា​អេឡិចត្រូនិក​កម្ពុជា គាំទ្រ​ដោយ​​​ក្រសួង​អប់រំ យុវជន និង​កីឡា ព្រម​ទាំង​គណៈកម្មាធិការ​ជាតិ​អូឡាំពិក​កម្ពុជា សម្រាប់​ការ​ប្រកួត​ជើង​ឯក​ថ្នាក់​ជាតិ​នេះ​មាន​ប្រាក់​រង្វាន់​សរុប​១៦​លាន​រៀល។ វិញ្ញាសា MLBB លេខ១​ទទួល​បាន​ប្រាក់​រង្វាន់​៦លានរៀល, លេខ២​ទទួលបាន៤លានរៀល និង​​លេខ៣ ទទួល​បាន​២,៥លានរៀល។ ចំពោះ​វិញ្ញាសា Efootball លេខ១​ទទួល​បាន​ ១.៤ លានរៀល, លេខ២ ទទួល​បាន ១.២ លានរៀល និង​លេខ៣ ទទួល​បាន​​៩​០ម៉ឺន​រៀល។

ទន្ទឹម​ជា​មួយ​គ្នា​នេះ សហព័ន្ធ​កីឡា​អេឡិចត្រូនិក​កម្ពុជា​បាន​បង្ហាញ​ក្រុម​អេឡិចត្រូនិក​២​ក្រុម​ដែល​នឹង​ចេញ​ទៅ​ប្រកួត​នៅ​ក្រៅ​ប្រទេស​ក្នុង​ខែ​វិច្ឆិកា​នេះ។ ក្រុមកីឡាការិនី CFU Serendipity តំណាងក្រុមជម្រើសជាតិ (ANGKOR WARRIORS) ទៅ​ចូល​​រួមប្រកូត ជើងឯកពិភពលោក លើកទី១៦ នៅរាជធានី​រីយ៉ាត ព្រះរាជាណាចក្រអារ៉ាប់ប៊ីសាអ៊ូឌីត​​ពី​​ថ្ងៃទី១១ ដល់ថ្ងៃទី១៩ ខែវិច្ឆិកា ឆ្នាំ២០២៤។

បន្ទាប់​មក​ ក្រុមកីឡាករ និងកីឡាការិនី ជម្រើសជាតិ (ANGKOR WARRIORS ) នឹងទៅចូលរួម​ប្រកួត ASIAN ESPORTS GAMES 2024 ​លើ​​​២​វិញ្ញាសា​គឺ  MLBB FEMALE និង ​eFootball Mobile នៅ​ប្រទេស​ថៃ​ពី ថ្ងៃទី២៣ ល់ថ្ងៃទី៣០ ខែវិច្ឆិកា ឆ្នាំ២០២៤ ប៉ុន្តែ​​វិញ្ញាសា ​eFootball Mobile ប្រកួតដល់ថ្ងៃទី២ ខែធ្នូ ឆ្នាំ២០២៤៕