ក្រុមកីឡាអេឡិចត្រូនិកអ្នកចម្បាំងអង្គរ បានក្លាយជាម្ចាស់ជើងឯកក្នុងព្រឹត្តិការណ៍ប្រកួតកីឡាអេឡិច​ត្រូនិក​ចិន-អាស៊ាន (China-ASEAN Esports Competition) ឆ្នាំ២០២៤ លើវិញ្ញាសា Mobile Legends Bang Bang បន្ទាប់ពីយកឈ្នះ ក្រុមម៉ាឡេស៊ី ដោយលទ្ធផល ២-០ ក្នុងវគ្គផ្តាច់ព្រ័ត្រនៅរសៀល ថ្ងៃសៅរ៍ ទី២៨ ខែកញ្ញា ឆ្នាំ២០២៤ នៅប្រទេសចិន។

នៅ​វគ្គ​សន្សំពិន្ទុ​ក្នុង​ពូល នៅ​ថ្ងៃ​ទី​២៧ ខែ​កញ្ញា ឆ្នាំ​២០២៤ ក្រុម​កម្ពុជា​បាន​យក​ឈ្នះ​ ហ្វីលីពីន ​ដោយ​លទ្ធផល ១-០ និង​បន្ត​ឈ្នះ​ម្ចាស់​ផ្ទះ​ចិន ដោយ​លទ្ធផល ១-០ ដើម្បី​ឈរ​លេខ​១​ក្នុង​ពូល A ឡើង​ទៅ​កាន់​វគ្គ​ពាក់​កណ្តាល​ផ្តាច់​ព្រ័ត្រ។ នៅ​វគ្គ​នេះ ក្រុម​កម្ពុជា​​ត្រូវ​បាន​ មីយ៉ាន់ម៉ា នាំ​មុខ ០-១ មុន​ ប៉ុន្តែ​ក្រុម​អ្នក​ចម្បាំង​កម្ពុជា បាន​វាយ​បក​យក​ឈ្នះ​ដោយ​លទ្ធផល ២-១ ដើម្បី​ឡើង​ទៅ​វគ្គ​ផ្តាច់​ព្រ័ត្រ។

ការ​ប្រកួត​​វគ្គ​ផ្តាច់​ព្រ័ត្រ ក្រុម​អ្នក​ចម្បាំង​អង្គរ​កម្ពុជា បាន​យក​ឈ្នះ ម៉ាឡេស៊ី ដោយមិន​ឲ្យ​តដៃ​រួច​ក្នុង​លទ្ធផល ២-០ ដើម្បី​ទទួល​បាន​មេដាយ​មាស​ក្នុង​នាម​ជា​ជើង​ឯក។

ព្រឹត្តិការណ៍កីឡាអេឡិចត្រូនិកចិន-អាស៊ាន​ដែល​រៀបចំឡើងដោយសហព័ន្ធកីឡាអេឡិចត្រូនិកអាស៊ី ចាប់​ពី​ថ្ងៃ​ទី​២៥ ដល់​ថ្ងៃ​ទី​២៨ ខែ​កញ្ញា ឆ្នាំ​២០២៤ ស្រប​ពេល​ដែល​សហព័ន្ធ​កីឡា​អេឡិចត្រូនិក​កម្ពុជា​បាន​បញ្ជូន​ពីរ​វិញ្ញាសា​គឺ Mobile legends Bang Bang និងវិញ្ញាសា Honor of King ដែល​មាន​ប្រតិភូ​១៧​នាក់​ដឹក​នាំ​ដោយ​ឯកឧត្តម លន់ សាមឌី អគ្គលេខាធិការ​សហព័ន្ធ​កីឡា​អេឡិចត្រូនិក​កម្ពុជា។ ចំពោះ​​វិញ្ញាសា Honor of King ធ្វើ​មិន​បាន​ល្អ​ទេ​ដោយ​​ធ្លាក់​ត្រឹម​វគ្គ​សន្សំពិន្ទុ​ក្នុង​ពូល៕