សហព័ន្ធ​កីឡា​អេឡិចត្រនិក​កម្ពុជា (EFC) បាន​ចាប់​ដៃគូ​ជា​មួយ​ក្រុម​ហ៊ុន T.Y Media ដើម្បី​ជំរុញ​ និង​បង្កើន​ការ​អភិវឌ្ឍ​វិស័យ​កីឡា​អេឡិចត្រូនិក​​នៅ​ក្នុង​ប្រទេស​កម្ពុជា​ឲ្យ​រីក​ចម្រើន​ឈាន​ដល់​កម្រិត​ស្តង់ដា​អន្តរជាតិ។

កាល​ពី​​ថ្ងៃ​អាទិត្យ ទី​១៨ ខែ​ធ្នូ ឆ្នាំ​២០២២នេះ សហព័ន្ធ​កីឡា​អេឡិចត្រូនិក​កម្ពុជា និង​ក្រុមហ៊ុន​ខាង​លើ​បាន​ចុះ​​ហត្ថលេខា​​លើ​អនុស្សរណៈ​នៃ​ការ​យោគ​យល់​គ្នា​​ក្រោម​អធិបតីភាព​លោក​ ជា ច័ន្ទបរិបូរណ៍ រដ្ឋលេខាធិការក្រសួង​ព័ត៌មាន និងជាប្រធាន EFC និង​លោក​ ធី​ វ៉ាយ​ អគ្គនាយក​ក្រុមហ៊ុន​នៅ​ក្រសួង​ព័ត៌មាន។

លោក​ ធី វ៉ាយ​ បាន​ថ្លែង​អំណរ​គុណ​ដល់​សហព័ន្ធ EFC ដែល​បាន​ជឿ​ទុក​ចិត្ត​ និងផ្តល់​កិច្ច​សហ​ប្រតិបត្តិការ​នេះ។ លោក​បាន​លើក​ឡើង​ថា កិច្ច​​សហការ​នេះ​គឺ​ដើម្បី​បង្កើន និង​ជំរុញ​ការ​អភិវឌ្ឍលើវិស័យកីឡាអេឡិចត្រូនិកនៅប្រទេសកម្ពុជាឱ្យមានសក្ដានុពល ទាំង​កម្រិត​ជាតិ ​តំបន់ និង​អន្តរជាតិ។ ជា​ពិសេស​ជា​ផ្នែក​មួយ​ជួយ​ក្នុង​ការ​ពង្រឹង​​កីឡា Esports ស្រប​ពេល​​កីឡាអាស៊ីអាគ្នេយ៍ លើកទី៣២ ឆ្នាំ២០២៣ នឹង​ឈាន​ចូល​មក​ដល់​នាពេលខាងមុខ។ ជា​មួយ​គ្នា​នេះ លោក​ក៏​បាន​បង្ហាញ​ពី​គម្រោង​ក្នុង​ការ​បង្កើត​​មជ្ឈមណ្ឌល​កីឡា​អេឡិចត្រូនិក T.Y Media E- Sport Centerសម្រាប់រៀបចំការប្រកួត​​​​កីឡាអេឡិចត្រូនិកគ្រប់វិញ្ញាសាទាំងអស់ ព្រម​ទាំង​ជា​កន្លែងបណ្ដុះបណ្តាលកីឡាករ កីឡាការិនីកីឡាអេឡិចត្រូនិកថែមទៀតផង។

ចំណែក​លោក ជា ច័ន្ធ​បរិបូរណ៍ ក្នុង​នាម​សហព័ន្ធ​កីឡា​អេឡិចត្រូនិក​កម្ពុជា សមាជិក​គណៈកម្មការ​ប្រតិបត្តិ​សហព័ន្ធ​ ក៏​ដូច​ជា​គ្រួសារ​កីឡា Esports ទាំង​មូល​មាន​សេចក្តី​សោមនស្ស​​រីក​រាយ​ដែលបង្កើត​ឲ្យ​មាន​អនុស្សរណៈ​នៃ​ការ​យោគយល់​គ្នា​នេះ។ កិច្ច​សហប្រតិបត្តិការ​នេះ​បង្ហាញ​ឲ្យ​ឃើញ​ពី​ការ​យក​ចិត្ត​ទុក​ដាក់​របស់​វិស័យ​ឯកជន​ជា​មួយ​​​សហព័ន្ធ​​ដើម្បី​រួម​ដៃ​គ្នា​ក្នុង​ការ​ជំរុញ​អភិវឌ្ឍ​កីឡា Esports នៅ​កម្ពុជា។

លោក​មាន​ប្រសាសន៍​ថា ៖«សម័យ​សង្គម​រាស្ត្រ​និយម​មាន​ពហុកីឡដ្ឋាន​ជាតិ​អូឡាំពិក។ សម័យ​សម្តេច​តេជោ ហ៊ុន សែន នាយក​រដ្ឋ​មន្ត្រី​នៃ​កម្ពុជា​មាន​ពហុកីឡដ្ឋាន​ជាតិ​មរតក​តេជោ ក៏​ដូច​ជា​មជ្ឈមណ្ឌល​កីឡា​អេឡិចត្រូនិក T.Y Media E- Sport Center។ មជ្ឈមណ្ឌល​នេះគឺ​ជា​លើក​ដំបូង​ដែលចេញ​ជា​រូប​រាង​សម្រាប់​កីឡា​អេឡិចត្រូនិក​នៅ​កម្ពុជា»។

«កន្លង​មក​សហព័ន្ធ​រៀប​ចំ​ការ​ប្រកួត​ផ្សេង​ៗ​នៅ​​​តាម​ក្លឹប ឬ​ហាង​​ផ្សេង​​​បាន​ល្អ​ហើយ ​ប៉ុន្តែមិន​ទាន់​មាន​ផ្ទះ​​​ផ្ទាល់​ខ្លួន​ពិត​ប្រាកដទេ។ ឥឡូវ​នេះ​សហព័ន្ធ​មាន​កន្លែង​ពិតប្រាកដ​ដែល​ជា​មោទនភាព​សម្រាប់​គ្រួសារ Esports ទាំង​អស់​គ្នា។ ខ្ញុំ​ជឿ​ថា ការ​ចុះ MoU នៅ​ពេល​នេះ​ពិត​ជា​ចក្ខុវិស័យ ​ជា​មូលដ្ឋាន​គ្រឹះ​ ​​ជា​មាគ៌ា​ពិត​ប្រាកដ​​​សម្រាប់​​វិស័យ​កីឡា​ Esports របស់​យើង​ដើរ​ឲ្យ​​កាន់​តែ​លឿន ទាន់គេ​ទាំង​ក្នុង​តំបន់ និង​ពិភព​លោក»។ លោក ជា ច័ន្ធ​បរិបណ៍ បាន​សង្កត់​ធ្ងន់។

ជា​មួយ​គ្នា​នេះ ​​​​អង្គ​ពិធី​ទាំង​មូល​បាន​អបអរសាទរ​ដល់​ក្រុម Impunity  KH ដែល​បាន​ឈ្នះ​មេដាយ​សំរឹទ្ធ​ពិភព​លោក​ជា​លើក​ដំបូងសម្រាប់​វិញ្ញាសា​នេះ​កាល​ពី​ពេល​ថ្មី​ៗ​កន្លង​ទៅ​នៅ​ប្រទេស​ឥណ្ឌូនេស៊ី៕